កំពង់ធំ៖ គិតចាប់ពីថ្ងៃទី៧ ដល់ថ្ងៃទី១០ ខែមីនា ឆ្នាំ២០២៣ ពិធីបុណ្យទន្លេលើកទី៧ នៅខេត្តកំពង់ធំ បានទាក់ទាញភ្ញៀវទេសចរ និងប្រជាពលរដ្ឋឱ្យចូលទស្សនាប្រមាណជាង ១លាន ១២ម៉ឺននាក់។

រដ្ឋមន្ត្រីក្រសួងទេសចរណ៍ លោក ថោង ខុន បានបញ្ជាក់ថា ចាប់ពីថ្ងៃទី៧ ដល់ថ្ងៃទី១០ ខែមីនា ឆ្នាំ២០២៣ ពិធីបុណ្យទន្លេលើកទី៧ នៅខេត្តកំពង់ធំ បានទាក់ទាញភ្ញៀវទេសចរ និងប្រជាពលរដ្ឋឱ្យចូលទស្សនាប្រមាណ ១ ១២៨ ៥០០នាក់។

លោកបានបញ្ជាក់បន្ថែមថា ថ្ងៃទី៧ ខែមីនា មានប្រមាណ ១៨ ៥០០នាក់ ថ្ងៃទី៨ ខែមីនា ប្រមាណ ៣៨៥ ០០០នាក់ ថ្ងៃទី៩ ខែមីនា ប្រមាណ ៤០៥ ០០០នាក់ ថ្ងៃទី១០ ខែមីនា មានប្រមាណ ៣២០ ០០០នាក់ ដែលភាគច្រើនជាប្រជាពលរដ្ឋមកពីក្រុង-ស្រុកទាំង៩ ទូទាំងខេត្តកំពង់ធំ និងប្រជាពលរដ្ឋមកពីបណ្ដាខេត្តជាប់ព្រំប្រទល់ ពិសេសខេត្តជាប់បឹងទន្លេសាប ដូចជា ខេត្តសៀមរាម កំពង់ចាម កំពង់ឆ្នាំង ព្រះវិហារ ខេត្តបាត់ដំបង ខេត្តពោធិ៍សាត់ ខេត្តស្ទឹងត្រែង ខេត្តក្រចេះជាដើម។

ទន្ទឹមនោះ អភិបាលខេត្តកំពង់ធំ លោក ងួន រតនៈ ក៏អនុញ្ញាតឱ្យពិធីបុណ្យទន្លេនេះបន្តលេងកម្សាន្តនៅថ្ងៃទី១១ និងទី១២ ខែមីនាថែមទៀត ព្រោះចំថ្ងៃសៅរ៍ ថ្ងៃអាទិត្យ ម្យ៉ាងប្រជាពលរដ្ឋក៏ចង់នៅដើរលេងកម្សាន្តបន្តទៀត ហើយអាជីវករក៏នៅបន្តលក់ដូរបានកាក់កបរាល់ថ្ងៃរាល់យប់ផងដែរ។

គួរឱ្យដឹងដែរថា រដ្ឋមន្ត្រីក្រសួងទេសចរណ៍លោក ថោង ខុន រំពឹងទុកថា បុណ្យទន្លេរយៈពេល ៣ថ្ងៃនេះនឹងទទួលបានភ្ញៀវទេសចរយ៉ាងតិច ១លាននាក់ ខណៈចំនួនភ្ញៀវទេសចរចូលរួមលើសពីការរំពឹងទុកទៅទៀត៕